|
|| shrIH||
shrImadvAgbhaTaviracitaH
aShTA~ggasa~ggrahaH
mahAmahopAdhyAyenduviracitashashilekhAvyAkhyAsamanvitaH
atha sUtrasthAnam
ma~ggalAcaraNam
rAgAdirogAH sahajAH samUlA yenA~ashu sarve jagato~apyapAstAH|
tamekavaidyaM shirasA namAmi vaidyAgamaj~jAMshca pitAmahAdIn|| 1||
TIkAkArakRutaM ma~ggalam
prodbhAsi-svaccha-sha~gkha-sphuTashashi-shakaloddAma-vaishadyahRudya-
prodyatsaundaryavaryaprakaTitavapuShaM naumi vAgIshvarIM tAm|
kallolollAsa-shAnti-pratata-sitatara-kShIrasindhvantarAla-
shliShyatpIyUSharekhAM smarayati vibudhAndhyAyato yo dayAluH|| 1||
sarasi suvipulAyurvedarUpe kRutAsthaM munivaravacanaughe dIrghanAle nibaddham|
racitadalamivA~ggaiH saMgrahAkhyaM sarojaM vikasati shashilekhA vyAkhyayendoryathAvat|| 2||
anAlocitatantrArthaH padAdAvakRutashramaH| yatrAvabhAShate mUrkhastatrAvAcyA vipashcitaH|| 3||
bandhacchAyAvisheShaj~jaH sUkShmamapyadhigacchati|
sukaverapi yA vAcaH kuNThAstA janasaMsadi|| 4||
kiyadvA kathayiShyAmi yatsatattvairna buddhyate pramANaM ca tadevAtra yadasmAbhirnirUpyate|| 5||
durvyAkhyAviShasuptasya vAgbhaTasyAsmaduktayaH|
santu saMvittidAyinyaH sadAgamapariShkRutAH|| 6||
so~ayaM vAgbhaTanAmA shAstrakAro lokahitAya shAstramAripsurvighnopashamAyAbhimata devatAnamaskAraM karoti rAgAdItyAdinA| rAgAdirogA yenApAstAH taM namAmIti sambandhaH| rAgAdayaH prasiddhAH| rAga AdiryeShAM ta ime rAgAdayaH| AdigrahaNena dveShAdInAM parigrahaH| rujantIti rogAH, rAgAdayashca te rogAshca rAgAdirogAH, saha jAtAH sahajAH janmanaHprabhRuti sharIriNA sa~ggatAH samUlA yenApAstAH| mUlameShAmaj~jAnam| Ashu shIghrameva| sarve na tu kecideva| jagato~api nA~a~atmana eva| tamekavaidyaM namAmi| ekashcAsau vaidyashca taM namAmi| eva~gguNayuktasyAnyasya bhiShajo~abhAvAttasyaikatvam| na hyanyo vaidyaH sahajatvAdyasAdhyalakShaNayuktAn rogA~jjetuM shaknoti| abhimatadevatAnamaskAraM kRutvA vighnopashamAyaiva punargurunamaskAraM karoti vaidyAgamaj~jAMshca pitAmahAdIniti| vaidyAnAmAgamo vaidyAgama Ayurvedasta~jjAnantIti vaidyAgamaj~jAH| AdigrahaNena dakShaprajApatyAdInAM grahaNam|| 1||
|